عمتي

حوار تم قبل سنوات .. تذكرته
ألغيت معظم كلماتي ... لتستمتعوا بكلماتها


حيا الله عثماني ... حيا الله وليدي
شلونك و شلون أمك و اخوانك !!؟

هذاك اليوم شفتك بالتلفزيون ، شملحك .. قاعد اتحجى عن شي ما اعرفه .. بس يا زينك و يا زين كلامك
و بنت عمتك ذاك اليوم يابت لي الجريدة ، و صورتك مزينتها تقول لي انك تكتب بالسياسة .. اش لك بالسياسة يا وليدي !! ما انفعت أبوك و يدّك علشان تنفعك

كبرت والله يا عثماني .. كبرت والله يا وليدي ... مسرع ما كبرت

سبحانه اللي مد بعمري ، وخلاني أشوفك و انت ريّال

و اظنتي ما راح ياخذ أمانته جريب

مليت يا وليدي من هالدنيا

أبوك مات .. وعماتك ماتوا .. وآنا الكبيرة .. قاعده

يا الله حسن الخاتمة

منت متزوج انت !!؟ إلى متى يا وليدي !!؟

يا وليدي تزوج .. قعدتك جذيه ما تنفع

و ييب لك عيال .. صج انهم ما ينفعون بهالزمن الأغبر ... بس على الأقل شي من ريحتك بالدنيا

حبيبي انت يا عثماني .. سبحان الله جني أشوف أبوك – الله يرحمه – جدامي .. حنون ... و تنحب .. على كثر مشاغلك ما نسيت عمتك العيوز
مو مثل اللي نسوا إني ليلحين ... عايشة

وانت كل ما تييني تييب وياك شي !!؟ اشيايب لي اليوم !!؟ رهش و حلوى !!؟ ويييي ... يا بعد عمري يا وليدي .. تدري إني أحبه .. بس مانعينه عني على ابو السكر .. و آنا روحي فيه .. قوم صك الباب لا أحد يشوفنا ... خن ناكل آنا و انت ... ومثل ما قلت .. ماكو إلا العافية

وييه يا وليدي ما شفت عمتك على شبابها ... انت ما شفتني إلا و أنا عيوز ... الحين تعرفط ويهي ... يا الله حسن الخاتمة

يا وليدي ... لا تخلي البيزات همك و أنا عمتك ... ترى ما تسوى دوسة اريولك

و الله يهديك لبنية الحلال إللي تعرف قدرك .. و يرزقك منها الذرية الصالحة .. و إذا ياك ولد .. سمه على المرحوم أبوك ... و إذا بنية خل أمها تسميها .. بعد اميمتها تعبت فيها و لها حق بعد
و هالله هالله في بنت الناس يا وليدي .. الله و رسوله وصاكم بالقوارير ... لا تهاوشها على أدنات الدون .. و سمعها الكلمة الحلوة .. ترى الحريم قلوبهم صغيرة .. مسرع ما ينقص عليهم

والله يا وليدي هالدنيا ما تسوى .. ما لها طعم بدون الناس اليّ نحبهم
بناتي .. سارة و سبيكة ماتوا على حياتي .. هم ماتوا وآنا ليلحين قاعدة .. سبحانه .. اللهم لا اعتراض .. بس يا شين الدنيا و انت تشوف عييلك يروحون على عينك

يا زينك يا وليدي و يا زين شطانتك .. من بد كل اليهال .. انت غير
سويت كل شي .. كل بلوى اكبر من الثانية .. شاق القاع و قايل انباع .. بس طول عمرك حقاني .. حتى لو على نفسك .. و حنون

أخليج الحين .. عمتي

وين بتروح يا وليدي .. خلك اقعد وياي !!؟

والله يا عمتي بمر المكتب .. و بعدين بروح الجمعية .. أمي موصيتني على أغراض تبيهم

إييي ... سلم على أمك يا وليدي .. و هالله هالله فيها

تامرين على شي .. عمتي !!؟

لا يا وليدي .. حافظك الله .. ناطرتك .. لا تنساني مثل غيرك

أنساك ده كلام .. أنساك يا سلام .. أهو ده اللي مش ممكن أبدا .. ولا أفكر فيه أبدا .. أبدا
آنا ما أقدر أنساك يا جميل

هيهيهي .. حسبي الله على إبليسك

و يوم الاثنين الياي آنا عندج إن شاء الله .. زهبي القهوة .. و آنا أييب الرهش و الحلوى

وصار الاثنين .. ورحت شريت الرهش و الحلوى .. ورحت لعمتي .. و إلا القهوة زاهبة .. و هي نايمة يمها .. النومة الأخيرة