26‏/10‏/2008

الحـُب


أعزائي ، عزيزاتي .. نتحدث اليوم عن البلاء الذي لابد منه ... الحب ، و الحب عبارة عن مشاعر عاطفية تربط بين شخصين .. المفروض رجل و امرأة
عزيزي القارئ .. عندما يكبس على مخك الحب فلن تستطيع أن تفرق بين نانسي عجرم و نعيمة الصغير ، و ستكون خريجة السوربون و خريجة رابعة ابتدائي واحد بالنسبة لك .. فالحب يعمي البصر و البصيرة .. بعيد عنك ، فكثير من الرجال ان احبوا شيئا في المرأة .. اخطئوا و تزوجوا المرأة كلها ، وللتدليل على صدق كلامي .. فقط اسحب لك كرسي في احدى مقاهي الافنيوز و تطمش على الشباب الكويتي المماليح و شوف مداماتهم ، اللاتي ينطبق عليهم ما ينطبق على مضاوي في المثل الشهير " ششوف فيج يا مضاوي ، و ويهج كله بلاوي" أكيد تذكرون هالمثل ...صح !!؟ يا خوي ليش تسوي جذيه بعمرك !!؟ يقولك الحب

الحب ينفذ الى قلب الرجل مباشرة .. دون المرور بعقله ، حتى عباقرة العالم من الرجال نجدهم احبوا نساء .. مخديات ، و هذا طبيعي في هذه الدنيا و التاريخ شاهد على ما اقول ، و اليكم الامثلة

ايفا براون و هي مصورة حـُولة عشقها هتلر و حكمت معه المانيا النازية ، و شجرة الدر حكمت دولة المسلمين وهي مجرد جارية لدى الامير ، صحيح انها انلعن خيرها بالقباقب ولكنها اضحت حاكمة ، أم صلـّوح خريجة ثانية ابتدائي مسائي تتحكم في صديقي الشحط بو صلـّوح وهو من حملة الدكتوراه .. عادي

عزيزي القارئ .. هل تعرف مواعين التيفال !!؟ ذاكرة المرأة كالتيفال تماما .. لا يلتصق بها أي كلام معسول ، فهي دائما ما تطلب من الحبيب سماع الكلام المنمق والغزل .. فمثلا ، إن قال الزوج لزوجته : حياتي .. ما ودج انروح السينما الليلة !!؟ ترد الزوجة : انت ليش ما تقول لي كلام حلو !!؟ مر الجمعية ييب حفاظات حق ولدك .. خيسنا
واذا قال الزوج : حـُبـّي .. شتبين أييب لج عشا !!؟ ترد الزوجة : انت عمرك ما تغزلت فيني .. عمة عينك .. أبي اثنين فلافل و واحد بيديان و خل يكثر الثوم .. ولا تطول ، تعال بسرعة
و اذا قال لها : يه يه .. خوش وحدة صايرة اليوم .. ترد المدام : يعني يكون تتغزل فيني !! سليمة " و انا حتى هذه اللحظة لا أعرف معني المصطلح الكويتي الشهير .. سليمة صكتك !! "

ولما المدام تشوف ريّلها يتابع - وفي كل براءة - مباراة فريقه المفضل .. تنط فوق راسة قائلة : يعني و بعدين مع هالمباريات !!؟ انت يا مباريات .. يا دواوين !!؟
الريل : حبيبتي .. انا ما سويت شي .. انا بس قاعد اشوف المباراة .. لو قاعد اشوف منة شلبي بالبكيني اقول معاج حق بس انا قاعد اشوف مباراة و المباراة مافيها حريم مفاصيخ .. والديوانية ما اروح لها الا يومين في الاسبوع .. مو وايد
المدام : منة شلبي بعينك .. من حلاتها عاد !!؟ قوم .. قوم .. ابي اروح السينما
الريل : منة شلبي مو حلوة !!؟ من شاف خشتج انتي ( طبعا قال هالعبارة بدون صوت ) حاضر .. بس خل تخلص المباراة و اوديج
ماكو مباراة .. قوم و قمقام " قمقام ..مصطلح كويتي مجهول المعنى "

تذكر عزيزي القارئ بأن طرفي الحب اثنين .. و كذلك الهوشات ، لابد ان تكون بين اثنين لذا فللمحافظه على الوئام و السلام بين طرفي الحب قدم العلماء دراساتهم للحفاظ على استمرار الحب
فذكرت دراسة أمريكية أن على الزوجين أن يفترقا لمدة 40 يوم و ليلة في السنة ، وذلك كي تبقى شمعة الحب – هذا ان كانت الشمعة موجودة اصلاً - بينها متقدة على الدوام وحتى يشعر كلا الطرفين بالشوق و الوله للطرف الآخر
إلا أن هناك دراسة كويتية –أفضل من الدراسة الأمريكية – تقول الدراسة الكويتية أن على الزوجين أن يفترقا لمدة 340 يوما ً على الأقل في السنة ، على أن يلتقيا في المناسبات و الأعياد الرسمية وذلك للتقليل من اللجوء الى استخدام العنف بين الطرفين قدر الإمكان

و كل حب .. و انتوا بخير
تحديث : كل الشكر لأخوي العزيز لنـدني على إهداءه لي تلك الصورة الرائعة على رأس المدونة .. تسلم يا لنـدني

‏هناك 184 تعليقًا:

`~MnO YeNSa! ~` يقول...

انا اولى

i`ll be back

حلاته اتفشل
pP:

Fashionista يقول...

فذكرت دراسة أمريكية أن على الزوجين أن يفترقا لمدة 40 يوم و ليلة في السنة ، وذلك كي تبقى شمعة الحب


الريال الكويتي مو كفو ينهد ليلة وحدة, الخيانة بدمه

بس يقول...

يا اخي و الله ظالمنا :((

ياحافظ ليش عاد :(


بس نا سمعت المثل اللي يقول


الحب عمي و قايده مينون :))


حافظك الرحمن

shahad يقول...

الحب أعمى صحيح بس حــــــــرام عليك!!

إنت هالرياييل امزوجهم حريم اخرعون... وبعدين احنا خربوطة اذا احد بدى جملة بحبي..! وسفل فينا بعدها هم بنقشي مو مصدقين احد عبرنا

خلكم عالدواوين و المباريات أحسن حافظينكم لنا ، يمكن تطلعون بره هالشيين ترد بصيرتكم اللي عماها الحب و تكتشفون ان حريمكم جياكر و دعل
p;

تحياتي للحب الأعمى

عثماني يقول...

حيا الله الغالية منو ينسى

ما عاش من يفشلج

دايما سباقة انتي

و ناطر عودتج بفارغ الصبر

:)

حافظج الرحمن

عثماني يقول...

حيا الله اخيتي
Fashionista

الريال الكويتي يخون من هاللي شافه من المرأة الكويتية

انا اقول .. بلا زواج ... ماكو خيانة

ابرك

:)

حافظج الرحمن اخيتي

و نورتي جيبة بمرورج

عثماني يقول...

حيا الله اخيتي الغالية بس

بس ..الله يهديج تحسبين كل الحريم سنعات مثلج!!؟

لا .. اسمع عن حريم طاريهم اييب الحارج

واي والله صدقتي على هالمثل

و انا ازيد عليه و اقول

الحب عمي و قايدة مينون و اللي طايح فيه .. متنيل بستين نيلة

حافظج الكريم

عثماني يقول...

حيا الله اخيتي شهد

والله من اللي اسمعه ان اكو هالنوعية من الحريم و انا اخوج

نوعية الهلاقة

و هذا الراي السنع .. الله يخلي المباريات و الدواوين

والا جان نسبة الانتحار طاقة السقف بين الرياييل

:)

حافظج الله اخيتي

ابو لطيف يقول...

يا هلا بالحبيب

ما خليت شي

اخاف انطق


سليمة صكحتك

من العربية الفصحى

قريتها مرة في احد القواميس

بس بصراحة نسيتها ...خبرك الذاكرة لك عليها

سليمى اعتقد اسم جبل او منطقة

اشوفها وارد عليك ان شاء الله

nanonano يقول...

أخوي عثماني يا حــــــــــــــــــافظ
أحنا جذي؟؟؟!!؟

المشكله ما عندي رد مقنع حقك لأن جميع الأمثله للي ضربيتها صحيحه

بس أصابعك أيدك مو وحده

موضوع الحب و خرابيطه هذا أنا متفقه معاك عليه ١٠٠٪

خوش موضوع..شكرا وسعت لنا صدرنا

الزين يقول...

لأ لأ لأ يا عثماني

انت كلش مو منصف

يعني البلا كله من الزوجه

عيل وين راحت بلاوي الريال



وعلى فكرة سليمة صكتك

السليمة يعني الدنيا

والصكة يعني موت الأم أو الأبو

اسم الله علينا من الصكات


نبي بوست عن الرياييل

الإنصاف زين ترى

:)

Enter-Q8 يقول...

عثماني
الله يعينك
انا شفت ردود بنات حواء عندك
بغيت اهون

بس سؤال بوجهه لهم

ليش الرجل يبحث عن شيئ خارج بيته

JiBLa CiTY يقول...

40 يوم ؟

يعني كل سنة ياهل

متى يمدي شسمه ؟

:|

بعد سبع سنين ماكو علاوة اولاد !؟

Purplecious يقول...

و أخيـــــــــــــــرا بوست جديد

:))))

عثماني انا شفت العنوان استانست قلت يا سلام صج عثماني يقرا أفكاري و بنزل بوست رومانسي من طقة هذاك البوست اليتيم اللي طفحنا من وراه رومانسيه... قلت معقولة توارد أفكار حتى أنا بوستي فيه كلام عن الحب من وجهة نظري الفلسفية

و لكن لما شفت الصورة هاهاهاهــــــاي
اتضح المضمون
عجيبه الصورة عثماني خطيرة
لووووووووووووول
و لا المملوح مملوح العرس انجبرت فيه
ههههههههههههه

ما اقول الا اللــــــــــه يعين كل مبتلى و هذا ابتلاء من الله ان شاءالله جزاه عند رب العالمين

و شفيــــــــــك على مضاوي فقيره ما سوت عليها خلها بحالها.. سمعت انها راحت لبنان حورفت بعمرها بسبة هالمثل هههههههه

بس عثماني معقوله جذي الحب يسوي؟؟ انا مو مقتنعه.. يعني لو وحده تنحب أفهم بس الهيلق شينحب فيهم؟؟؟ ليش الحب أعمى ليــــــــــــــش؟؟؟؟

أنا أقــــــــــول ابعد عن الشر و غنيلوه... و يالله لا تبلينا بهالبلاء

غير معرف يقول...

الحمدالله والشكر ياربي عسانا مانصير منهم ولا نصادف هالنماين
مدري اشايفين بدنيتهم اللي صاروا جذيه الله لايبلينا

انا ترى انزل بالبراوزر شوي شوي ومااااااودي يخلص المقال ههههههههه يعطيك العافية مكانك يشرح الصدر

darkness يقول...

امبيه سويت البنات نسرات و الرياييل ملائكه


ترى الحقيقه العكس

:(

عاد صج فاقدينك

و مكانك مبين

بس شكلك انت مو فاقدنا

و ودك بالفتك بنا عن بكرة ابينا

:(

ترى صج ضيقت خلقي

mtfa2el يقول...

بعد هذي المرة الكويتية
إذا دشيت مكان و سلمت عليهم قالوا عيونه زايغة و مغازلجي و يبي يسولف مع البنات ..و إذا ما سلمت قالوا شدعوه يا حافظ تكانة زيادة عن اللزوم

إذا شفت سيارتها مبنجرة ووقفت و قلت : عسى ما شر اختي تبين مساعدة ؟
قالت : لا داقة على اخوي لو سمحت و مو عيب عليك توقف و تسولف مع بنات الناس شنو انت ما عندك خوات ؟؟
و إذا ما وقفت قالت راحوا الرياييل ما يشوفوني بنت واقفة بنص الشارع محد يساعدني ..

إذا دشيت وزارة و طلبت مساعدة من موظفة قالت ما تشوف في رياييل موظفين سيدة ييتني يا اللي ما تستحي و إذا قلت لها لو سمحتي في موظف أقدر أكلمه شبت عليك و قالت و شدعوه يا حافظ حرام تسألنا يعني ولا حرام ..مو ناقص إلا تقول يا خراشي و تيمع عليك مجمع الوزارات كله

شكلي بانطق خل اوقف احسن
p.s :
just kidding :p

JooJ o MaJooJ يقول...

شل غيبة :)
ياربي مو هدا إلي إسمونة ملح الحياة و الزواج بس عاد ترى انا اقولك المرة ماتنعطى ويه شل الريال إلي إقولها إنشاءالله او اهوة إشوف مباراة و وديها السينما...شل عبوو :P
jooj

على نفسها جنت براقش يقول...

اللى يطق الباب ينعطى جواب

:)


واصابع ايدك مو سوا

و اتوقع الدراسه هذى غلط
لان اللى اعرفه

364 يوم

:)

RoOra يقول...

oO alryayel wen ra7w 5alek mon9ef :p~
etha mobarat w7da belshhr tehon bs etha kelyomen game shtswe almra :p

mn zman 3n postatek welcome back ;D

الجوري يقول...

لول


بوست عجيب


(:

منين يايب هاالصورة العجيبة
لول

بس حرام عليك

هالحجي ينطبق على النسرات

فقط

QiYaDiYa يقول...

اتفق معاك في موضوع ان تلاقي مثلا الزوج دكتور و المرة ما تعرف كوعها من بوعها !!

في بعض الاحيان انصدم في ناس ما احس ان يلوقون على بعض !!
مادري شلون بيعيشون !!

بس سبحان الله نصيب !!!

بس في اشياء اختلف معاك فيها p;

مخلي المرة اهي اساس البلا
p;


شكرا على البوست ..
و الصورة ابداااع p;

3bady يقول...

اول شي اهلاً بعودتك اخوويي فقدناك :))

الصورة الي حاطها مو صج هههههههههه من وين طايح عليها ؟ :P

هاذول حريم الكويت كثر ما اندلع فيهم يقولون ناقصنا دلع

سليمه اتصحكك حسب معلمواتي يقولون اتعرف النباتات الي بالبحر ما ادري اشلون صايره بس اهم مو نباتات نفس اشياء جذي جنها ايد مفتوحه

كانوا يسمونها سليمه

فصارت سليمه تصكك صكت حزتك :P

سؤال يقولون اذا كان الريال زين المره مو زينه و العكس صحيح

هل تأيد هالمقوله ؟ :))

صبا يقول...

ليش حاط صورة عررررررسي ؟؟


انزين وين باجي الصور ,,رفيجاتي الي قاعدين يبخروني ؛)

وصور العشا الي بالحوش :)


..بس شرايك بريلي مزيووون صح؟؟

تبي الصراحه الي قلته نوعا ما صح ,, بس هم الرياييل عيونهم زايغه ولا جان الله ما حلل لكم اربعه :P


ومتفااائل يووووز عن البنات



اقولك شي والله صج مو جذب ...

أعرف واحد مثقف .. متزوج وحده جدا جميله....
حب وحده سيلانيه ,اتعرف شنو سيلانيه؟؟

تلوع الجبد وتزوجها علي الاولي السنعه
الحلوه ,بالذمه مو خبال وعماة عين

يالله هذا انتو يالرياييل

7osen يقول...

عثماني عندي سؤال

ليش دائماً الريال المتزوج بنظرك مغلوب على امره
وصاير تابع للزوجة

هههههههههه

شكلك متعقد من الزواج

بس
بوست روعة صراحة

والمثل مال مضاوي عجييييب
ههههههههه

مسكين هذا الريال

يعطيك العافية

Mishari يقول...

هاهاهاهاهاه

انا اقول اذا اكو وحدة لى الحين جذى على الدنيا السلام

لا يبه حرام تري عثماني وايد هوست عليهم :)))

Tekana يقول...

مو يقولون مراية الحب عميا

والمشكله ان الحريم النسرات يطيحون برياييل يهبلون ودابة رحمن والعكس صحيح

vancouver يقول...

من شاف خشتج
) طبعا قالها من غير صوت(
لوووووووووووووووووووووووووووووووووووول

ههههههههه
الله يغربل ابليس ابليسك يا عثماني

بس تعال اكوو ادميه تقول حق ريلها قوم وقمقام
امبيييييييه بحياتي ما سمعت هالمصطلح
لا من مرا ولا ريااال هههههههه

شنو قمقاااام ?
لوووووول


يالله يا كريم اشوف عثماني ولد ام عثماني طاب على خشته بالحب
وغرقان فيه ويشوف حبيبته جينيفر لوبيز حتى لو هي معالي زايد
لوووووووووووووووووووووووول امين امين

هههههه
---------

عثماني انت اخوي صح وقلبك كبير ويتقبل النقد صح
?
اوكي
من باب الميانه ودي اقولك انه الصوره اللي حاطها بالبوست ترى ماهي عدله
هالصور انشروا بالنت وبالذات بالايميلات لاحد العروس القديمه من ايام السبعينات مادري الثمانينات
عثماني ترى اللي بالصوره اوادم مالهم شغل
اكيد واحد نذل بعايلتهم طايح عالصور وناشرهم
بس الستر زين وانا اختك
الواحد وين يروح من حوبه فضح ستر الناس
انا واااايد اتضايق لما توصلني هالايميلات فيها صور عروس وخصوصيات ناس
ترى اللي بالصوره يمكن احفادهم اليوم يشوفونهم بالنت
وين يودون ويوههم بالله
??

صج ومن قلب انصح كل شخص لما يشوف هالايميلات يحذفها
لانه اللي ما ترضاه لنفسك مالازم ترضاه لغيرك
حتى لو ما تعرفها

اقول قولي هذا واستغفر الله لي ولكم

:)))))


عاد جذيه وتصير فيك
الله لاااااا يقول
وعقب 30 سنه نشوف صور عرسك بالنت
لووووووووووووووووووووووووووووووووووووووووول

عاد ساعتها تذكر فانكوفر
وقول صدقتي ياخيتي
واقرى على روحي الفاتحة اذا الله ماخذ امانته
:(

alsaronah يقول...

كااااااااااااااااااااااااااك


امبي انت حدك شي والله ...

والله حتى الحريم لي شافوا واحد شحلاته ماشي مع سحته كموا على بعض .. مالت شوفي السحتة شخذت ؟؟!!! لووول

والله ياخوك انا اقول لك اذا رديت عليك بموضوع عن الريال راح نتعادل بس خل اجمع الفكر اول لوووول
ثاني شي صح الزواج دمار ، لحد يتزوج حلات العزوبية والله :D
والله انا متقبلة الزواج بحالة وحدة اذا كان الريال مستعد يكمل دراسته معاي برا غير جذي مابي لوووول
مومالت زواج انا مناجر ثاني يوم بيطلقني لووول :D

خلك عزوبي تدلع نفسك ولا مرة تدلعك ;)

Sweet Revenge يقول...

كل هذا بقلبك وساكت يا عثماني P:
يبا الحريم مساكين بالكلمة الحلوة تملكهم بس ماكو عيزنا نتكلم
الحمد لله علي السلامة ,مكانك بين :)

الطارق يقول...

عطني مهلة يومين افكر وارد لك خبر :)

لين يقول...

مع إني ما أتوقع إن المكتوب من قلب بس و الله رفعت ضغطي :@
بنات الكويت أحسن بنات و الكل يتعلم منهم السنع بنات الخليج كلهم يشوفون الكويتيه شتسوي و يقلدونها ..

يمكن في فئه بسيطه مثل اللي قلتهم بس مو الكل ..
وصح كلامك بالنسبه حق دراسة امريكا أما دراسة الكويت فليش تزوج الريال من الأساس :s

عثماني يقول...

حيا الله اخوي الغالي بو لطيف

افا عليك .. ما عاش من يلمسك و انت بضيافة عثماني

( الخوف لا ننطق انا و انت .. الله يستر)

:)

لغة عربية فصحى ؟؟

سبحان الله

اي والله يا خوي ... نبي المعلومات كاملة

شوقتني اعرف اصل هالكلمات

حافظك الكريم يا خوي

عثماني يقول...

حيا الله اخيتي نانونانو

الله يهديج نانو

انتي تشوفين البنات السنعات اللي انتي منهم .. و بس

لا .. ترى هم اكو بنات هيلق

و يطلع منهم بلاوي

و بيني و بينج .. متعمد احط موضوع خفيف .. الناس طقت جبدها من ضيقة الخلق

حافظج الله اخيتي

عثماني يقول...

حيا الله اخيتي الزين

من عيوني الثنتين

بكتب بوست بشلخ فيه الرياييل تشلخ

ولا يهمج

بس ترى ما اردى من المربوط الا المفتلت و انا اخوج

الكويتيين و الكويتيات .. مادري شلون صاروا
:(

حافظج الله يا الغالية

عثماني يقول...

حيا الله الغالي
Enter-q8

اي و الله ..الله يستر

انت بس لا تباعد

خلك يم اخوك .. اخاف وحدة تتهور و تكفخني الا انت يمي

:)

و سؤالك يه في الصميم

اتمنى القى له اجابة عند خواتنا السيدات

حافظك الله يا الغالي

عثماني يقول...

حيا الله اخوي ولد جبلة سيتي

انت الله يهداك شايل هم هالسالفة !!؟

40 يوم كافي و انا اخوك

يمدي .. يمدي .. لا تحاتي

ثانيا 40 يوم .. هذول يسون لهم ياهل كل سنة

فيهم البركة ان شاء الله

حافظك الله يا خوي

عثماني يقول...

حيا الله الغالية بيربل

ببدي من النهاية

اي و الله .. الله لا يبلينا

الرومانسية مكودة عندي .. و طايحة بجبدي

ما ابي انزلها .. الناس اللي فيها كافيها و انا اخوج

بعد ايي انا و اعميها مرة وحدة !!؟

على طاري الصورة .. اللي قاعدة يم العروس .. شنو موقعها من الاعراب ؟؟

يمكن سبير للعروس؟؟

والله مافيني الا كل خير على مضمض .. دلع مضاوي

بس وايد تطري على بالي

:)

والخلاصة .. الحب مو بس اعمى .. الا اصمخ و اطرم بعد

حافظج الكريم اخيتي

عثماني يقول...

حيا الله اخيتي غير معرف

اي والله .. لله الحمد

الواحد يحمد ربة ان عاش وتربى بعايلة تكانة

التربية و انا اخوج اهي الاساس

و مشكوووووووووووووورة على كلامج الطيب

هالكلام اللي يخليني استمر

حافظج الله اخيتي

ولا تحرمينا من تعليقاتج الطيبة

عثماني يقول...

حيا الله الغاااالية
داركنس

افا يا ذا العلم

عاد كل شي ولا زعل داركنس

لج علي اكتب بوست اشلخ فيه الرياييل تشلخ

الحين انا كاتب هالبوست علشان توسعون صدوركم

تقولين لي ضاق خلقج!!؟

:(

و ما تفقدين عزيز اخيتي

والله اني هم فاقدكم

بس الله العالم بالظروف اللي تمنعني عنكم

بس تأكدي ان كل حرف تكتبونة اقراه

و بالنسبة لي .. حلو اني ما اثقل عليكم بمقالاتي

حلاتي خفيف

:)

حافظج الله اخيتي

عثماني يقول...

حيا الله اخوي العزيز متفائل

اشهد ان كل كلمة قلتها يا متفائل في محلها

يا خوي ما ينعرف لهم

يعني احنا شنسوي !!؟

بكل الحالات نطلع احنا الغلطانين

افا عليك .. ما عاش من يلمسك و انت بضيافة عثماني

( الخوف لا ننطق انا و انت .. الله يستر)

:)

حافظك الله يا الغالي

عثماني يقول...

حيا الله الغالية جووج

وشهد شاهد من اهلها

اي والله .. شهالعبو !!؟

علشان تعرفون ان الرياييل مساكين

و ملح الحياة هذا اييب الضغط و يؤدي الى الموت المفاجئ

الا على الطاري .. يعني شنو عبو !!؟

:)

حافظج الكريم اخيتي

عثماني يقول...

حيا الله اخيتي براقش

اطلعت دراستج اهي الاظبط

364 يوم ... يعني بس يلتقون يوم واحد بالسنة .. وناسة

:)

اكيد .. اصابع ايدي مو سوا .. بس حبيت اداحركم

معشر النساء

:)

بيني و بينج .. طقت جبودنا من ضيقة الخلق اللي تارسة الديرة

حافظج الله اخيتي

عثماني يقول...

حيا الله اخيتي روورا

افا عليج .. بكون منصف

و بنزل بوست اشلخ فيه الرياييل

واذا على سالفة المباريات .. انا بسئلج

يشوف مباريات و الا يشوف اشياء ثانيه؟؟

;)

ما تفقدين عزيز

و ان شاء الله اكون دايما بينكم

حافظج الرحمن

عثماني يقول...

حيا الله اخيتي الجوري

بيني و بينج جوري

النسرات تارسين الديرة

هالصورة لقيتها بايميلي من زمان .. عاد قمت و حطيت عليها هالتعليقات

و عسى دوم اكون عند حسن الظن

:)

حافظج الرحمن اخيتي

عثماني يقول...

حيا الله اخيتي قيادية

و ساعات تلقين العكس والله قيادية

المرأة شغل عدل .. و الريال اثول

سبحان الله

فعلا نصيب

و المرأة اساس كل شي حلو

( قاعد ارقع البوست )

:)

و العفو اخيتي

و ان شاء الله دوم اكون عند حسن الظن

حافظج الرحمن

عثماني يقول...

حيا الله اخوي عبادي

ما تفقد عزيز ...جزاك الله كل خير

الصورة هذي يا خوي دازينها لي بالايميل اكثر من مرة

بس انتيكه الصورة

:)

اشهد ان كلامك عدل .. المدح فيهم ضايع

و دايما يطلعونك انت الغلطان

سليمة صكتك اختلفوا فيها العلماء

بس انا ناطر اخوي بو لطيف يعطينا الاجابة الشافية عن اصل كلمة سليمة صكتك

انا و الله ما اايد هالمقولة .. انا اقول الطيبون للطيبات و الخبيثون للخبيثات

اكيد هناك استثناء .. و ناس طاحوا على ويوهم و توهقوا

بس ليلحين الدنيا بخير

حافظك الله يا خوي

عثماني يقول...

حيا الله الغالية صبا

اول شي انا حطيت صور عرسج لاني امون عليج

و باجي الصور ما حطيتهم .. لانهم ببساطة .. يقصون الويه

عاد الله يهداج ما لقيتي تلبسين الا هالنفنوف ؟؟

و مسيكين ريلج .. وين مزيون الله يهداج

لو ماخذة الي يصب قهوة ابرك

:)

والله كل اللي قلتيه عدل

اعرف جم واحد .. من خوش الشباب

و تزوجوا اردى البنات

مو بس من حيث الشكل .. حتى من حيث الاخلاق و التربية

بس شتقولين ... نصيييييب

حافظج الله

عثماني يقول...

حيا الله اخوي 7osen

هيهيهيهيي

لا والله مو مسألة متعقد

بس والله من هاللي اشوفة و اسمعة من المتزوجين

مو كلهم طبعا

الروعة مرورك يا خوي

لا تقاطع

حافظك الكريم

عثماني يقول...

حيا الله الغالي مشاري

بذمتك مشاري .. بيني و بينك .. انت مو مستانس اني هوست عليهم !!؟

:)

والله اظن اكو .. هالنوعية من الحريم ما تنقرض

حافظك الكريم يا خوي

عثماني يقول...

حيا الله اخيتي تكانة

كلامج درر والله يا تكانة

بس سبحان الله

كل ساقط له لاقط

و السالفة سالفة نصيب

الشكوى لله و انا اخوج

حافظج الرحمن

عثماني يقول...

حيا الله اخيتي فانكوفر

ببدي بالنقد اول شي

اول شي انتي تمونين .. ولو تبيني اشيل المدونة كلها .. ما راح اقول لا .. افا عليج

هالصورة فانكوفر انتشرت بطريقة غير عادية .. صدقيني اتيني اكثر من مرة بالايميل

و اصادفها اكثر من مرة في المنتديات

بس هم لج علي ابدلها .. بس ان شاء الله اعرف شلون.. خبرج انا ميح بالتكنلوجيا

و انتي ما الله هاديج عن هالدعاوي !!؟

يعني شلون اقولها لج ؟؟

ما ابي اتزوج

مش عاوز اتجوز

ما بدي اتجوز

بدييييش اتنيل و اتجوز

لو اعرف ايراني جان قلتها بعد

وتعالي انتي ... انا محاربج

خلي كاريزما و بيربل ينفعونج

دايما وياهم ضدي

مع ان انا المجني عليه

:)

حافظج الرحمن انتي و العايلة

عثماني يقول...

حيا الله السارونة

خلك عزوبي تدلع نفسك ولا مرة تدلعك

هذي انا بعتبرها حكمة

طول عمرج حكيمة يا سارونة

:)

و ما له داعي تردين علي بموضوع عن الرياييل

هم الرياييل مو ناقصين

:)

حافظج الرحمن يا الغالية

عثماني يقول...

حيا الله اخيتي
Sweet revenge

الله يسلمج من كل شر

و ما تفقدين عزيز ان شاء الله

الحريم مساكين صحيح .. بس مو الحين و انا اخوج

الحين احنا المساكين والله

عيزنا نقول كلام حلو .. هم ماكو فايدة

:(

حافظج الرحمن اخيتي

عثماني يقول...

حيا الله اخوي الطارق

لا تطول .. بس يومين

ترى حتى يومين وايد .. اشدعوة

:)

حافظك الله يا خوي

عثماني يقول...

حيا الله اخيتي لين

ما عاش من يرفع ضغطج يا لين

السالفة كلها غشمرة

اكيد مو كل الحريم بهالصورة

ليلحين اكو البنات السنعات

هونيها و تهون .. و ابتسمي

اقولج ابتسمي لو سمحتي

عفيه .. على الشاطرة

:)

حافظج الرحمن

JooJ o MaJooJ يقول...

العبو يا عثماني..نوع من انواع تحلطم العيايز إلي كلا أسمعه من يدتي أتوقع نفس شل بلشه :p
best regards ;) jooj

اقصوصه يقول...

مساكين يالرياييل

وااااايد مطلومين

كسرتوا خاطري:(

لدرجة اني مفكره اسويلكم جمعيه

للدفاع عن حقوقكم(المهضومه)

خخخخخخخخخخخخخخ

swan.beach يقول...

ولكم باك عثماني D:

بالاول بارك لي خلصت اختباراتي والنتايج ان شاءالله تمام

وعلى البوست اشفيهم الحريم حلاتهم والله مستحملينكم على دواوينكم ومباريانكم الي ما يخلص دوري الا مبلش دوري ثاني واذا مافي ع التلفزيون رحتو ملاعب المنطقة وسويتو مباريات
ولا اذا خلصتو من المباريات بلشت الدوواوين الي مو ما احبها الا اكرها من كثرة القعدة فيها ابي اعرف الديوانيه مالها وقت محدد
الي اعرفه من صلاة المغرب لي العشا ليش لي صلاة الفجر
واذا خلصنا من الدووااااوين
طلعت سالفة المجمعات والكافيهات روح شوف الافنيو الشياب اكثر من الشباب

وعلى هالمقولة ( و اذا قال لها : يه يه .. خوش وحدة صايرة اليوم .. ترد المدام : يعني يكون تتغزل فيني !! سليمة " )
يا كثر ما اسمع رفايجي يقولونها لا تحجو عن ريااييلهم وماني عارفه المعنى لي اليوم

للأمانة الي كتبته كله من خلال سمعي لرفيجاتي المتزوجات ومشاكلهم مع ريااييلهم
فاعذروني يا رجاله p;

جني طولت بالحجي

qesat_5ayal يقول...

LOL

شكلك حاقد

:P

غير معرف يقول...

يامعود زوجتي مالها حس وتنحط عالجرح يبرى. للحين تستحي تدق علي تدزي ام اس امز. بخطبلك اختها:)

الخيلاء يقول...

هههههه

وين طايح على هالحريم الملسن

و سليمه تصكك: سمعت انها بمعنى مصيبه اتصكك .. طبعا هذا حسب ما سمعت ز العهده على الراوي :)

ضـاد يقول...

ايه دا يا شيخ؟


نص موضوعك بو حب
ونص الثاني بو طب
بالبنات وا عليا عليهم


ظليمتك شينة يا راااااجل

someone_q8 يقول...

السلام عليكم
اشلونك اخوي عثماني , لما قرت البوست تذكرت حديث الرسول صلى الله عليه وعلى آله وصحبه وسلم عندما قال : ان اكثر اهل النار هم النساء , فقالوا الصحابة لماذا يا رسول الله قال : لانهم كاسيات عاريات رؤسهم كأسنبة البخت , وانهم ناكرات العشير . او كما قال رسولنا الحبيب صلى الله عليه وسلم

اخوي عثماني خل انكون منصفين اشوية يعني احنا يالرياييل كاملين ؟ طبعا لأ حتى اهم متحملين بلاوينا ومتحملين اشكالنا وبعض الريايل الله لا يوريك ابخل ما خلق ربي شنو تتوقع من زوجته اتسوي فيه ؟

طبعا المثل يقول لو خليت خربت
كل واحد يكمل الثاني , لكن بوستك الوحيد اللي لما اقراه اضحك من قلب :)

ولد الديرة يقول...

مشكلة المرأة الكويتية والرجل الكويتي تتلخص في

انهما كويتيان

مجتمعنا قاتل للحب

اولادنا قاتلين للحب

الدواوين قاتلة للحب

جاي الضحى قاتل للحب

الغسّال اللي اصبح بويهه قاتل للحب

الحَب افيد ولا يتحلطم ويذوب بين شفتيك وارخص من الغالاكسي
















استر على ما وايهت البعلة وصلت

ولد الديرة يقول...

Fashionista

بعد اذنك عثماني



شهادة نعتز فيها :q

Peace يقول...

المشكله مو بالحريم
المشكله باللي ما عرف يختار

ShLaLaT يقول...

لوووووووول يا الظاااااااااااااالم


هذي مو حريييييييييم
هذي وحده ملسونه لسانها يلوط اذانها


p;


وهذا موكويتي
لااااااااا يمكن اصدق انه كويتي

:):):):)

عثماني يقول...

حيا الله اخيتي جووج

خوووش معلومة

و الله يحفظ يدتج

:)

عثماني يقول...

حيا الله اخيتي اقصوصة

نستاهل منظمة كاملة .. مو بس جمعية

:)

خلاص .. انتي سوي الجمعية و انتي صيري الرئيس

و انا نائب الرئيس

علشان تصير الصكة براسج

:)

حافظج الله اخيتي

عثماني يقول...

حيا الله الغالية
Swan beach

مبرووووووووووووك

الف مبروك

انا اشوفج غاطة .. قلت اكيد لاهية

هذوله رفيجاتج يخرعون .. شكلهم كاسرين روس رياييلهم

ثانيا بذمتج .. يجابل المباريات و الدواوين

والا يطيح له مغازل او يتزوج مرة ثانية ؟؟

خوش سؤال .. صح؟؟

:)

حافظج الله اخيتي

ولا تقاطعين

عثماني يقول...

حيا الله اخيتي قصة خيال

لا والله ماني حاقد

بس كاسرين خاطري الرياييل

:(

حافظج الرحمن اخيتي

عثماني يقول...

حيا الله اخوي غير المعرف

يا معود لا تقول جذيه

بعدين احد يصكك عين و ما تترقع

ما شاء الله .. تبارك الرحمن

الله يهنيك بام العيال يا خوي

هالنوعية من الحريم نوعية نادرة .. انقرضوا الحين

ما اوصيك .. دير بالك عليها

و حطها بعيونك

حافظك الرحمن

ولا تقاطع

:)

عثماني يقول...

حيا الله اخيتي الخيلاء

انا مو طايح عليهم

و الله يبعدني عنهم .. قولي آمين

بس هالسوالف مما قرأت و سمعت

يعني سليمة هي المرادف لمصيبة

خوش تفسير

:)

حافظج الرحمن اخيتي

عثماني يقول...

حيا الله اخيتي ضاد

ازايك يا أختي ؟؟

يا ضاد هانم .. المشكلة زي ما انتي عارفه متشعبة و معأدة

بس باين ان الستات صعبانين عليكي .. طب و الرجالة .. مش بيصعبوا عليكي ؟؟

هم مش بني أدمين و الا ايه ؟؟

مادري ليش .. اشتهيت ارد بالمصري

:)

حافظج الله اخيتي ... ضاد هانم

عثماني يقول...

حيا الله اخوي الغاااالي
Someone-q8

انا بخير عساك بخير

شلونك انت يا خوي؟

صدق رسول الله – صلى الله عليه و سلم

اهو تبي الصج ؟

ساعات الرياييل يصيرون ادعل و ما ينتعاشرون

اعرف رياييل اتصور ان حريمهم ضامنين الجنة بسبة هاللي يسونه فيهم رياييلهم

بس تدري .. لابد من التحرش بالقوارير

:)

و ما لنا غناة عنهن

و يا عساك دوم قلبك يضحك .. يا خوي كل شي حوالينا قام يضيق الخلق

فضروري نخلق الابتسامة بين وقت و الثاني

حافظك الرحمن

عثماني يقول...

حيا الله اخوي ولد الديرة

ممممممم

خوش كلام

معنى كلامك التالي :

اخذ فلبينية

و اعيش و ياها في تنزانيا

و تكون اهي بدار و انا بدار علشان ما نييب عيال

و تنزانيا على خبري ما فيها دواوين و لا جاي الضحى

واهناك ماكو غسال سيارات .. جان غسال بعارين .. يمكن

و انطيح له هناك حب شمسي

يا الله سترك

و على قولة الاعلامي الكبير بو عيدة

صوتك وصل الى fashionista

:)

حافظك الكريم يا الغالي

عثماني يقول...

حيا الله اخيتي
Peace

اي و الله صدقتي

هذي الزبدة

الاختيار

بس المشكلة ان الحب عمي و انا اخوج

الريال ينعمي على قلبه و يحب وحدة مو كفو

وتالي يتوهق

حافظج الكريم اخيتي

عثماني يقول...

حيا الله الغالية شلالات

حرام عليج

الحين لان المسيكين يقول كلام حلو طلع مو كويتي ؟؟

ايا الظالمة

خو الكويتي معروف .. السانه ينقط عسل

اما الكويتية .. احسن وحدة بالعالم للتجعم

:)

حافظج الرحمن شلالات

دروازة يقول...

أخي وعضيدي

ولكم بااااااااااااااااااااك

ما بغيت ترجع لبوستاتك المبهرة :)

المشكلة تدري وينهي فيه؟؟

المشكلة بالملاج...

مفروض لما يكتب عقد الزواج

ويحدد البنت بكر ولا ثيب ... لازم يحدد بعد "أم لسان" ولا "مكسورة الجناح" !!

هاههاهاهاها ... أتغشمر

ترى مشاكلنا لها نوعين

مشاكل معشر الشوارب

تلقاه يايك من الدوام... شياطينه تطامر جدام عيونه من مشاكل الدوام ... يقوم يحط حرته بالمرة والاولاد... عاد هني تختلف ردود الافعال بناءا على المره ... اذا بنت ناس تحملت وتعوذت من ابليس... واذا ماهي بنت ناس شالت شلايلها وياه... خطر ما يتزاردون جدام العيال!!وعقب النكد هذا ... يطلع لك الحبيب ما يبي يطلع المسكينة أو يونسها بسالفة حلوة لأن الأخ متابع مباراة!! يعني لا عقل ولا رومانسية...!!

مشاكل نون النسوة

تييك متروس راسها من زميلاتها بالدوام ... اللي مسوين دوامهم يمعة مو مكان عمل.. متروس راسها من قصص الخيانة والطلاق وهذي شسوت وفلانه شحطت
تالي ترد البيت وفي بالها مليون خطة وخطة تبي تربط فيها ريول وايدين وعيون الحبيب "يعني بتحافظ عليه" وطبعا في أسوأ الحالات ... من كثر ما السوالف ترست راسها... تقوم وهي بالطريج تتخيل أن ريلها خاين ... وتحط ريلها في مكان الريال الخاين اللي قالولها قصته... شيصير؟؟؟ تدخل البيت وعيونها كلها شر وشك وغيرة من كل شي ... حتى من القطوة اللي بزبالة فريجهم!! ومن هني تبدي افلام الخيانه الصجية... لأن الريل يقول بينه وبين نفسه دام ان مرتي شاكه فيني أول وتالي ... عيل خل التعب اللي اييني من هالشك يسوى !! وانت فاهمني :)

بس ماعليك ... ما تقدر تعيش من غيرهم... صدقني.. واسأل مجرب :)

swan.beach يقول...

يحيك ويبقيك :)

وعلى السؤال الاوريجينال

(( ثانيا بذمتج .. يجابل المباريات و الدواوين

والا يطيح له مغازل او يتزوج مرة ثانية ؟؟

خوش سؤال .. صح؟؟ ))

شوف لا يت الصجيه وربي رزقني بولد الحلال لا والله يجاابل المباارة احسن له
وديوانية بيتهم او اقرب ديوانيه بالفريج p;

بالاصل يا ويله مغاازل
امووت قهر "):
وبعد مره ثانيه تبي ذبحتي والله

ميرامار يقول...

ليش بيديان وفلافل وثوم؟ :(
ماكو كرواسون وباتون ساليه؟

النجرة هي توابل العلاقة بعيار معين تصبح الطبخة اجمل بس لا تزيدها تعور بطنك P:

انا شفت حبك.. شوف حبي :)

عثماني يقول...

حيا الله اخيي دروازة

هلا بالغالي

اي والله صدقت

ما نقدر نعيش من غيرهم

اهي المشكلة مثل ما قلت

من الطرفين

المفروض انهم يبطلون دعالة

و ما يلتفتون لصغائر الامور

حلوة صغائر الامور هذي

:)

عموما

مشتائين لك برشا برشا

حافظك الرحمن انت و العايلة

عثماني يقول...

حيا الله الغالية
Swan beach

بعد الله يهديج احد ياخذ swan beach و يروح يغازل !!

هذا سمحي لي .. اهبل

ثانيا سلامتج من القهر

علميني عنه و انا اكسر راسه

:)

حافظج الله اخيتي

عثماني يقول...

حيا الله اخيتي ميرامار

الكرواسون و الباتون هذي شغلات ما تييب راس هالنوعية من الهوانم

:)

المشكلة ان نادرين اللي يعرفون

شلون يظبطون عيار هالتوابل

احيانا يزيدون الجيلة .. فتصير الحياة .. كسافة

وهذا انا مريت و شفت حبج و علقت بعد

و هم سيرت على المطر

تامرين امر اخيتي ميرامار

:)

حافظج الرحمن

تراب الكويت يقول...

المرأة
الرجل
الحب
الزواج

شر لا بد منه ;)

have a nice day :)

والموت يعشق فجأه مثلي..والموت مثلي لايحب الإنتظار يقول...

العزيز عثماني

صراحة أبدعت بالبوست ...

و مشاهد جميله وخفيفه ...

وبالنسبة للمصطلحات الكويتية مثل سليمة و سليحط انا نفسك ودي اعرف مصدر هالكلمات ...

بس حرام عليك ... خف عليهم شوي (ماجني منهم ) :)

بوست واقعي .. وان لم يتقبله البعض .. بصراحة هو حقيقه والله يعين الرجال :)

دمت بخير وسلام

Barrak يقول...

ششوف فيج يامضاوي


هههههههههههههههههههههههههههههههههههههههههههههههههههههههه

عثماني يقول...

حيا الله اخيتي تراب الكويت

أي والله

كل هاللي ذكرتيهم

مصايب

:)

Have a nice week end

:)

حافظج الرحمن

اخيتي

عثماني يقول...

حيا الله اخيتي
والموت يعشق فجأه مثلي..والموت مثلي لايحب الإنتظار

الله يجزيج كل خير يا الغالية

اشهد انج حقانية

أي والله ..الله يعين الرجال

و هم الله يعين الحريم على بعض الرياييل .. الدعله

و انا مستغرب من هالكلمات .. شلون ابتكروها

والحمد لله ان البوست اعجبج

و ان شاء الله دوم الابتسامة تارسة ويهج

:)

حافظج الرحمن اخيتي

ولا تقاطعين

عثماني يقول...

حيا الله العزيز براك

هيهيهيهيهي

يازلك المثل ؟؟

ترى عندي امثال عن مضاوي و بدرية و هناء و مكية و سها

يعني تشكيلة

و هم عندي امثال تفصيل ... عطني الاسم و ازوع لك المثل

:)

حافظك الله يا الغالي

و يبيلنا طلعة ترى

eShamiYa_RockS يقول...

الـــــله!!

البوست ونــســني الصراحة!


لأنه يعلّم الناس انها ما تيأس دام انه ممكن الطرف الآخر يحب و يتغافل عن العيوب ...(و يا كثرها)

D:

ZooZ "3grbgr" يقول...

شفت الشمعه على اليمين؟
اتوقع ماتوا محروقين

BenT BonD يقول...

الله بهداك ليش كل هذا!!
ترى والله في العكس
يعني اكو رياييل جياكر ماينشافون وحريمهم احلى منهم بواايد ولما افكر واقول شلون خذته اهني اعرف انه يا من الحب يا نصيب اهوا صج الزواج نصيب بس قصدي ان ياا مخطوبة عن طريج الاهل او انها كانت تحبه


وبعدين انت لاتشوف هالبنات الفاصخين اللي بالشوارع واللي ماوراهم ولي
حتى كلمة مشكور ماتعرفها

وياي وحدة بالدوام توها متوظفة يديدة ماكو لا اسلوب ولا حيا
لما احد يدق تلفون على مكتبها وتشيله تقول هذي جنه قاصبينها ترد عالتلفون كلش ماكو اسلوب جنها تكلم واحد من الياهال وفووق هذا واحد من الشباب اللي بالدوام كان يبي يخطبها وسأل عنها وكلم اهلها بس مايبونه
وانا لما اشوف نفسي اقول اشفيني وعليه محد خطبني مثلها
بس دايما الافضل يبقى وحييد والمتردية والنطيحة على قولتهم يمشي سوقهم

فريج سعود يقول...

سمعت عن الكويتي الي قاعد يطالع قناة لبنانية ويقول حق زوجته

ابي هذيل اشياكلون

قالت وهي معصبة ياكلون تبن


قالها على طاري التبن شخبار ابوج ؟

Mamloo7a Q8ia يقول...

يا حافظ يا وخيي غثماني
عاد احنا جذي؟؟؟
شهالامثله السيئه
اقول يا خوي الغالي لا تشوف مسلسلات سكوب وايد
ترى تعطيك امثله مو زينه
هههههههههه
مساكين هالمتزوجات يلاحقون الرومانسيه من رياييلهم بالتفق

صبا يقول...

لا تتحرش بنفنوفي عند فراوله

باجر تترجاني اسلفه حق مرتك

...ما أعطيها تلبسه ..مرتك متينه ..مو كبرهاااااا:P

؛)))

عثماني يقول...

حيا الله اخيتي
Eshamiya_rocks

تعجبني نظرتك التفاؤلية

الناس ما تخلى من العيوب و انا اخوج

:)

حافظج الرحمن اخيتي

عثماني يقول...

حيا الله اخيتي
ZooZ "3grbgr

او .. منتحرين

:)

حافظج الكريم اخيتي

ولا تقاطعين

عثماني يقول...

حيا الله اخيتي
Bent bond

اول شي من قال ان محد خطبج ؟؟

انا يتراوالي ان اللي يبونج قد شعر راسج ..بس انتي اللي تبين شي معين

وان شا الله نصيبج ياي لج .. لا تستعيليين

و هالاشكال للاسف .. تارسه الديرة

بس الشكوى لله

و تذكري دايما ... ان الحب عمي

:)

حافظج الكريم

عثماني يقول...

حيا الله اخوي الغالي ولد فريج سعود

هيهيهيهيهيهيهيهيهيهي

قمة الرومانسية صاحبنا

عجبني

:)

حافظك الله يا خوي

عثماني يقول...

حيا الله اخيتي الغالية مملوحة

يدورون الرومانسية بالتفق من رداهم و انا اخوج

الكويتيات مو مال رومانسية

( جني نسيت روحي .. و غزرت بالحجي)

:)

و على طاري سكوب .. صدقيني مملوحة قاعدين نشوف مسلسلاتهم بالشوارع هالايام

ترى اتغشمر .. الكويتيات .. زي العسل

:)

حافظج الله اخيتي الغاااالية

عثماني يقول...

حيا الله اخيتي صبا

انا لو مرتي تلبس هالنفنوف ... جان اكت عليها كاز و اشب فيها ليلة العرس

ثانيا اشفيهم المتان ؟؟

اونس من المساحيت

( المساحيت هن امهات العصاقيل العصلات )

:)

حافظج الله

و بسج مداحر

:)

Bronzeya_Na3oma يقول...

في نسرااات بس ياربي مو لي هالدرجة
ياما في بنات من طيبة قلبهم و على نياتهم رياييلهم يلعبون بايدهم و ريلهم و اعرف وحده تموت على ريلها وتداريه و اهو كل يوم مع وحده يقول تعودت واهيا صااابره =((

Ni3Na3aH يقول...

om 9loo7 o bo 9loo7 shakilhom film
very nice post
;)

قلب طفله يقول...

الصوره فللللم بروحها
و التعليقات محصلتش :))))
امبيه حدي متاخره خيو عثماني انت تنزل البوست بالسنه حسنه فالمفروض
ما ينتظوووف احجز بالمقاعد الاولى :)

البوست راويته امي تقول الله يحفظك و يسعدك على هالحجي الحلو و عجبها المثل
و ربعه لووووووول

تسلم ايدك خيوو روعه كالعاده ^_^

Kuwait يقول...

حسبي الله على ابليس العدووووووو
لي يومين ادش واضحك واضحك واضحك وماعرف شنو اكتب وامشي D:
دير بالك من الحب ;q

terkwaz يقول...

لووول

شنو هالحريم نسراااات

ككككك


انزين واللي عنده دكتوراه وزوجته
ابتدائي بس زوجته تفهم اكثر منه لووول

شنو تصنيفهم :pPpP

فراوله يقول...

مساالورد والجوري
مساالغلا للغالييين
اللي وحشونا هاااالكبر
اخوي الفلته
صج انك عجيييب وماجذبت يوم سميتك الفلته
الله يغربل ابليسك
عاااد ماكو الا فلافل وبطاط وبيديان
وييه والمصيبه بعد ثووووم
صج خلطه مو طبيعيه
هههههههههههههههههههههه
هههههههههههههههه
ههههههههههههه
اخوي الغالي
اعذرني لاني من زمااان مامريتك
بس والله اخر مره
تحياتي لخفة طينتك
:)))

عثماني يقول...

حيا الله اخيتي برونزية نعومة

الله يهديج نعومة .. هاللي تعرفينها مو صاحية

الحين تدري ان ريلها لاعب لعب .. و ساكته !!؟

عاد قلنا ان المرة السنعة تصبر .. بس مو جذيه

عسى الله يهديه ان شاء الله

يصير اتعرف عليه ؟؟

:)

حافظج الرحمن اخيتي

عثماني يقول...

حيا الله اخيتي الغالية نعناعة

اي والله

هذول يبيلهم بوست بروحهم

عاد هذول الاثنين انا اعرفهم شخصيا.. تحفة

:)

حافظج الرحمن اخيتي

عثماني يقول...

حيا الله اخيتي قلب طفلة

اول شي

و قبل كل شي

تحياتي للوالدة العزيزة

و قولي لها نقلا عن لساني " شلونج خالتي ؟ "


:)

والروعة مروركم الحلو اخيتي

و ان شاء الله اكون دوم عند حسن الظن

وبيني و بينج .. اكتب بالسنة حسنة و تقرون لي

احسن مما اكتب كل يوم كلام فاض .. مو صح ؟

:)

حافظج الكريم اخيتي

عثماني يقول...

حيا الله اخيتي كويت

لا توصين

داير بالي عدل

:)

ودوم ان شاء الله تضحكين

حافظج الله يا الغالية

عثماني يقول...

حيا الله اخيتي تركواز

عاد وايد اللي حريمهم افهم منهم

و هذول يكون تصنيفهم

دكتوراه مع مرتبه الهبل

:)

حافظج الرحمن اخيتي

عثماني يقول...

حيا الله الغالية فراولة

يا مسا الانوار

اسفرت و انورت و استهلت و امطرت

معذورة اخيتي

اهم شي انج رديتي لنا بالسلامة

بس ترى ما راح نقبل بانقطاع اخر

:)

حافظج الكريم اخيتي

ونورتي جبلة بطلتج عليها

charisma يقول...

ولالا اهم شى انك شااد حييلك ومسمييه الحب ... انا قريت العنوان وقلت اتفرغ له بعدين ولما ياا بعديين ششوووووووووف
وشقرااا لول اجراام اجررااام

توقعت هالشى اناااا توقعععت

الله لا يحرمنا من خفت طينتك يا عثمانى
موتنى ضحك

Barrak يقول...

انا حاضر

عليك تحديد المكان والزمان

Ra-1 يقول...

الحب أعمى p:

BenT BonD يقول...

ههههههههه اخ عثماني حشى والله محد ياني عشان اردهم
واكو احد يعافى الستر ويكمل نص دينه!!!

عثماني يقول...

حيا الله كاريزما هانم

على بالج شغل رومانسيه ؟؟؟

:)

لا غلطانه

الرومانسية مو لنا يا يوبه

خلف الله علينا .. وينا و وين الرومانسية

سليحط على قوله العيايز

:)

حافظج الله عزيزتي

عثماني يقول...

حيا الله براك

خلاص يا خوي

تريا مني مخابرة هاتفية

( حلوة مخابرة)

و نتفق ان شاء الله

عثماني يقول...

حيا الله اخيتي
Ra-1

أي والله اعمي

و اصمخ ساعات

:)

حافظج الرحمن

عثماني يقول...

حيا الله اخيتي بنت بوند

افا عليج بس

خلي هالموضوع علي

و تزهبوا حق الطوابير اللي بتوقف على باب بيتكم

و ان شاء الله تكملة نص دينج على ايدي

بس قرقشي مخباتج انتي

و ما يخدم بخيل

:)

و تذكري دايما

الخير فيما كتب الله سبحانة

ما تدرين وين الخير

حافظج الرحمن اخيتي

عتيج الصوف يقول...

هاهاهاهاه

الله يعين صديقك بو صالح اللي صاير سكانة مرته

أنا أعتقد إن مافيها شي لو كان القرار مشترك مابين الوج و الزوجه بغض النظر عن حالة القيادة أو السيادة على الآخر

فهذه الأمور متعلقة بالتكوين النفسي للشخصيه ذاتها

Bronzeya_Na3oma يقول...

اييي عثماني انا ميته من القهر حارتني تقول شسوي بصبر
جان زين يصير تتعرف عليه ادري بتمحطه خوش محطه خخخخخ
قلت لها لو ريلج عندي جان اوريه نيوم السما بعز القايله :\
ريلي يخون اشكره هااااع و الله لاخليه يحفر قبره بيده و يدفن روحه

BenT BonD يقول...

ههههه مشكور وماتقصر ودام انك تمشي تحت سياسة القريشات فخلني بالاول اتبرع حق مسلمي افريقيا بعدين اعطييك ههههه

وهذا اهوا احنا مآمنيين بالله وقدرته فننطر متى ما الله كتبلنا نصيب حتى لو نصك ال 50

shakshaka يقول...

LOOOOOOOOOOOOOL EDAAAAAAD! 7araaaam 3laikkk mo kil il7areeeem chithee sij elsanhum 6uweeel bs 3al habbbany khwaaara tilga itgola chitheee 3shan yeghzelha zoood;p wana agrab methaaal etha a7ad meda7nee 3adi aseba mn il 7aya:P 3la goooolat yadeti allah yer7amhaa "7ubin feeeh e3thoooth" :P

احمد سالم يقول...

عثماي ترى قالتها أم كلثوم
أهل الحب صحيح مساكين

عثماني يقول...

حيا الله الغالي عتيج الصوف

وانا معاك يا خوي

بس احيانا تكون القيادة بيد المرأة تماما

و الرجل مسير ..لا مخير

تلقاه مدوده .. مو عارف شيسوي

:(

حافظك الكريم يا خوي

عثماني يقول...

حيا الله اخيتي البرونزية النعومة

افا عليج

هاللي بصير ريلج يحمد ربه اصلا

هالدور يخونج؟؟

ما عنده سالفة

:)

حافظج الرحمن يا الغالية

عثماني يقول...

حيا الله اخيتي الغالية بنت بوند

وليش افريقيا .. مسلمي جبلة اوله

:)

عفيه عليج

وكلي امرج للرحمن

و ما راح تشوفين الا اللي يسرج

حافظج الله اخيتي

عثماني يقول...

حيا الله الغااااالية المختفية شكشكة

عيل ما نمدحج

بعد اخاف امدح احصل لي مسبة

:)

الله يهديج .. المرة لو يصير السانها حلو

الريال يذوب بين ايدها

خو الريال مثل الياهل ..بسرعة ينقص عليه

قصوا علينا بكلمه حلو .. وشوفوا الدلع

حافظج الله اخيتي

ولا تقاطعين

عثماني يقول...

حيا الله اخوي العزيز احمد سالم

أي والله اصدقت ثومة

فعلا مساكين

و يكسرون الخاطر بعد

بس الشكوى لله

اللهم احفظنا

سعيد فعلا يا خوي لمرورك

shakshaka يقول...

3asa walaht 3laaaiy bas?:P khalaas ya3ni 3a6aitni il green light 7ag il kalam il7ilooo?:P

wo ana lo feeeni shay yinmidi7 chan gilna bit7ooooshik sabba bs makooooo:P

غير معرف يقول...

http://benkerishan.blogspot.com

http://benkerishan.blogspot.com

http://benkerishan.blogspot.com

Someday يقول...

البلاء

جزا البارحة جفني عن النوم
جزا من غرابيل الزماني
صبرت أمس مع قبل أمس واليوم
وأشوف العشر تصفي ثماني.
عذابٍ على العشاق مقسوم
تولعت يوم الله بلاني
يلزّم علىّ الشوق تلزوم
وأنا يوم لزمته عصاني.
سجيم الهوى ما يسمع اللوم
حنين الجفى سدّد أذاني
شريف على التيكات مخدوم
ولا هو من الطرز الجباني
طريح على اللذات محروم
صوابه خطر بين المحاني.

kAiKa-MGroMa يقول...

lool ambeeh

لوول لا عاد بنات الكويت ماكو اسنع

منهم .. ولازم في طرف يتنيحس عشان

يكملون بعض

P:.

عثماني يقول...

حيا الله شكشكة

اي والله ولهت عليج .. بس شوية مو وايد

:)

القرين لايت مو شغال .. اللمبة محروقة

:)

والكلام الحلو مطلوب .. بس وين يا خلاف !!؟

:(

و يوزي عن هالتواضع

حافظج الله اخيتي

عثماني يقول...

حيا الله اخيتي
Someday

الله

يا عيني

ذكرتيني بذيج الغناية الناطعة

طول عمرج ذوق

:)

حافظج الرحمن اخيتي

عثماني يقول...

حيا الله اخيتي الكيكة المقرومة

عاد لازم نداحر بنات الكويت

اذا ما طفرناهم .. من نطفر ؟؟

والنحاسة متوفرة بالكويت عند الطرفين الحريم و الرياييل

لا تحاتين

:)

حافظج الله اخيتي

Fa6ooma يقول...

أولا شكرا على هالموضوع الحلو و خفيف الطينه. بس جنك وايد حاط علينا حطه:) والله أنا أشوف الحب أعمى صح بس من ناحية الحريم, أما الرجاله فلا و ألف لا, يحسبونها عدل بالمل محد يقص عليهم:) ثانيا أنا أتفق مع fashionista بأن لا بد من شوية فجه, خل الواحد يتنفه و يوله شوي. 40 يوم واييييييد زين :)

just a bunch of thoughts يقول...

لوول بوست حلو :)

(و لو انه حاط علينا و الريال حده خيالي بس هم يضحك!)

انا اللي مت عليها "قوم و قمقام!" وااااااي مت من الضحك! لوووووول

بالنسبة حق كلمة "سليمة تصكك" ، مرة سمعت بالرادو ان كلمة سليمة تعني غيمة . غيمة سودة اذا ماني غلطانة بس عاد مادري شلون غيمة تصك الواحد!ّ لول أكيد القصد منها البرق . يعني بالانجليزي: hit by lightning

عاد هذا اللي ذاكرته ... يمكن غلط. بس معنى "سليمة" انا متأكدة منه، و يعني الغيمة + مادري شنو

P:

ShaymoOona يقول...

لاء لاء موصج ..ليش عاد امطلع ال women جذي ..اطالب ابوست يدي عن الManZ

chandal/danchal!! يقول...

loooool... 1st salaam 3aleekom obo el 3atham...
Ween el jikir? Illa mil7 o imra! Ezzeen 3endena wesheen 7awaleena,, el q8at kilhom ma yinti6aalayoon mn mil7hom؛p

O ba3deen 7itta lo sheena,,,, kheerin! Shil/moshkila!,,, magyoola,,, errasool da3a 7ag esheena؛p,,, fqayra malha rab,,, inta mitba66er 3ala ni3mat Allah؛p... Ana kalamee 3an el mar2ah el q8ah ma ekaffeeh reply 3ala ur blog؛p... Fi 7adeerh lirasool 3aleeh e9alaat wesalam ma ya7thernee bs mathmoona... inna kan yensa7 benta gabel ezawaaj b inna.. El mar2ah essaal7a illi etha shaafha zojha asarrat-h..... Wa itha ghaab 3anha 7afathat-h... Etarawaalee kil 7areem el q8 chiihee wa lillaah el 7amd wal minna..
O ham egooloon,,,ethfar b thaat eddeen tarebat yadaak... O itha ghabbat gabbat looool.....O bs salamatkom.. 3yoonee gamat etzaghlel ma ashoof zeen talee elleeel loooool..... Arjoo inna ekoon kalaamee khafeef 3aleek... Allah halla bessana3 ezeeen... Ma awa9eek... Kather mn hal blogs... fi amaan ellaah؛‎)‎

vancouver يقول...

عثماني
ويييييييينك
يالله نبي بوست يديد
مشتاااائييين

لا تبطي علينا
!

عثماني يقول...

حيا الله اخيتي فطومة

عفوا عفوا

40 يوم الواحد ما يمديه يشم نفسة خليها 200 يوم

:)

ثانيا معروف عن الرياييل ان مسرع ما ينقص عليهم

مو الحريم

حافظج الله اخيتي

عثماني يقول...

حيا الله اخيتي
just a bunch of thoughts

انا ما احط على الحريم .. بس احب اتغشمر معاهم

و واضح ان العلماء اختلفوا في تفسير سليمة تصكك

بس اعتقد ان تفسيرج هو الاقرب للمعنى الصحيح

حافظج الله اخيتي

عثماني يقول...

حيا الله اخيتي شيمونه

حاااضر

من عيوني

عاد شدعوة ال مينز مقصرين ؟؟

ولا يهمج .. بكتب عنهم

:)

حافظج الرحمن اخيتي

عثماني يقول...

حيا الله اخيتي دنجل جندل

و عليكم السلام و رحمة الله و بركاته

اول شي .. طلعت عيني و انا احاول اقرا تعليقج اخيتي

العربي على انجليزي مو قادر عليه

و تأكدي ان كلامج خفيف على قلبي اكيد

و اللي قلتيه كله عدل مدل

و الموضوع ما يزيد عن كونه غشمرة .. مو اكثر

و حاضر .. اكثر من هالبوستات

من عيوووووني

حافظج الله اخيتي

عثماني يقول...

حيا الله اخيتي العزيزة فانكوفر

انا كاني

موجود

بس هالسفرات اذبحتني و انااخوج

و البوست اليديد قريب ان شاء الله

حافظج الرحمن اخيتي

مستعدة يقول...

والله إذا ينلاقي رجل بالأوصاف اللي قلت عنها هذا ويهي p:..

الحب أعمى من طرف المرأة .. أما الرجل فما أتوقع عنده مشكلة ينعمي من أكثر من وحدة p:..

إستمتعت بالإسلوب اللي طرح فيه الموضوع ^_^

Ra-1 يقول...

Yalla new post!

Shaima'a Alkandari يقول...

يامااا حنشوووووووف وحنسمع حقااات وحقات

عثماني ياخوي الحب اعمى وخلاص عاد

ده الألب ولي اختاروا

شوف مهما تسوي المره ماراح يعجب الريال ومهما يسوي الريال ماراح يعجب المره

بس تدري حتى لو يتشكون ويقولون كل واحد منهم يعتبر حجي الطرف الثاني عسل على الألب واهنى اتذكر المقوله ضرب الحبيب زي أكل الزبيب

ونزل بوست يديد :)

bu-saad يقول...

:)

هالجيل الي اتكلم عنهم جيل قبل ...الحين غير..عدل والا!

bu-saad يقول...

طمني يا خوي خخخخخخ

عثماني يقول...

حيا الله اخيتي المستعدة

واضح ان سبب استمتاعج هو الاسلوب الذي طرح به الموضوع .. لا الموضوع نفسة

و هذا المهم

:)

فنحن بحاجة للابتسامة في هذا الزمن و انا اخوج

و تاكدي ان الهدف هو الابتسامة .. و المرأة احلى ما خلق الله على هذه الارض

حافظج الله اخيتي

ولا تقاطعين

عثماني يقول...

حيا الله اخيتي
Ra-1

حاضرين للطيبين

قريبا باذن الله

حافظج الكريم

عثماني يقول...

حيا الله اخيتي شيما

و ازيد على كلامج ... ان ما للريال غناة عن المرة و لا المرة لها غناة عن الريال

و البوست اليديد بالفرن

قريبا جدا ينزل

باذن الله

حافظج الله

عثماني يقول...

حيا الله اخوي الحداق بو سعد

شلون غير يعني ؟؟

يعني صاروا اردى ؟؟

لا لا ما اسمح لك يا بو سعد

بنات هالوقت احسن بنات

عاد فجج بروحك الحين .. اشرايك فيني و انا اقلب السالفة عليك ؟؟

;)

حافظك الله يا خوي

`~MnO YeNSa! ~` يقول...

تدري
يا عثماني

اني
ياي
اشوف مودنتج
جان اشوف وبل تعليقي الثاني
رااااااااااااااااااااااح

مابي :(

تدري شنو
ضاااااااق خلقي

Mamloo7a Q8ia يقول...

ولهنا على سويلفاتك
وينك ياوخيي
ناطرين البوست اليديد
لا تطول علينا

غير معرف يقول...

hi
heheheee u r sooo funny
please new funny topic
yours/ anstk ya saidi mn blad elshqr ;P

Shaima'a Alkandari يقول...

بالفرن



شكله بيكون له طعم الذ من اللذييييييذ


مترقبين على ناااااااار

`~MnO YeNSa! ~` يقول...

* ياية

بدلياتي
خيالية

Fskra يقول...

3thmaniiiiiiiiiiiii ;p

thb7tni mn el th7k ;p

Omi eli 9arlha 7 months ma th7kt youm gret laaha your post gamt edm3 mn el th7k ;p

bs 3ad 7ram 3lik ako bnotat 3sL mo chethy g6e3a

5osh post ;p

عثماني يقول...

يا حيا الله الغالية منو ينسى

لا يضيق خلقج ولا شي

و اعتبريه وصل

خو انتي راعية المدونة

افا عليج

و ما شاء الله

البدليات عندج ... مبدعة

:)

حافظج الرحمن

عثماني يقول...

حيا الله اخيتي المملوحة

توله عليج العافية اخيتي

البوست اليديد خلال ايام يكون زاهب

و ما لي غناة عنكم

حافظج الله اخيتي

عثماني يقول...

حيا الله انستي من بلاد الشرق

حاضر

البوست اليديد قريبا جدا جدا

تؤمري أمر

:)

حافظج الرحمن

عثماني يقول...

حيا الله اخيتي شيما

خوفج يحترق و اتوهق

و يطلع طعمة ماصخ

الله يستر

:)

حافظج الله شيما

عثماني يقول...

حيا الله اخيتي فسكرة

عساج انتي و الوالدة الله يحفظها دوم مستانسين و تضحكون

والله انج ونستيني بكلماتج هذي

احس اني سويت شي يفرح الناس و هذا المهم عندي

عيل اقري لها البوستات القديمة و قولي لي رايها

:)

حافظج الله اخيتي

`~MnO YeNSa! ~` يقول...

ويييي
وييي
توني اجيك على
comments
اللي طاف
سمالله علي
سمالله علي
بدلياتي
عجيبة

على قولتك مبدعة

و ابداعي راقي بعد
p:

يلا
نزلنا بوست يديد
بس نبي شي
ونيس
ينسينا
هالازمة
لا من اقتصاد ولا من سياسة
يكافينا الشر

waiting

`~MnO YeNSa! ~` يقول...

e7m e7m
هههههههههههه


*اللي طافوا

عثماني يقول...

منو ينسى

يعنى ماكو فايدة !!؟

هم بدليات

:)

ما شاء الله عليج

صاحبة مبادئ

ما تتخلين عن بدلياتج لو مهما حصل

:)

والله الواحد ودة يكتب شي يونس .. بس ضيقة الخلق لاحقتنا و انا اخوج

:(

غير معرف يقول...

بس حبيت اعلق على كلمه "سليمه صكتك" سليمه هي تصغير كلمة سلمى .. والسلمى باللغة العربية هي الدنيا .. ولما يقول لكويتيين سليمه صكتك فمعناتها عسى الدنيا تصك بويهك .. بعيد عنك وعن القراء .. وسلامتك

عبدالله

贵阳川麻将 يقول...

Some of the content is very worthy of my drawing, I like your information!

Sameh يقول...

بس نا سمعت المثل اللي يقول


الحب عمي و قايده مينون :))

عثماني يقول...

حيا الله اخوي عبدالله

خووووووش معلومة

جزاك الله خير يا خوي

ولا تقاطع

عثماني يقول...

حيا الله اخوي العزيز سامح

اشهد ان كلامك صحيح

حافظك الرحمن

ولا تقاطع يا خوي

www.jsfishnet.com يقول...

A friend told me this place I have been looking for, I come, it turned out, I have not disappointed, good Blog
fishing net

splendid يقول...

balagui098
jianada66
niriniya
kamainong
kenuodiya

الوتيــــــــــن يقول...

سليمة تصكك اتوقع مصيبة تاخذ عمرك (باسمالله عالكل)..

الحب مو أعمى بس إلا أطرش .. ماراح اقول شلون...

فعلا كنت اتمشى وأشوف وأستغرب ( قولي تنقهرين) .. ألاقي واحد ماشالله طول بعرض بويه سمح .. واللي يمه تشوف مخها من خنفرها .. ياربي ماتشووووووووووف !!!
والا وحده وياي ايام الجامعة .. الكره المدورة .. شفتها بجمعية الشامية .. قلت وي مواعده قلت بنفسي طبعا .. طلع ريلها واهي طلعت حامل ( مادريت ليمن غابت بعد الولاده) .. بس صج سبحان الله .. القلوب جنود مجندة .. ما تآلف منها إءتلف وما تنافر منها افترق .. يعني السالفه مازالت مبهمه

بس الوصف خطير يعطيك العافية

عثماني يقول...

حيا الله الوتين

فعلا

هالشغلات ما لها تفسير

سبحانه من الف هالقلوب على بعض

:)

سعيد لطلتج

حافظج الرحمن

رَاقِصَةٌ عَلى أوْتَارِ الْغَنَجِ ، يقول...

مساء الخير ،
البوستْ عجيب لطالما شدني
هاللون من الكلمات ..
-
معاك بنقطة جوهرية
الريال يحب شي بالمره و يتزوج
المره كلها :× ..
و بطريقة تدقر الحريم لرياييلهم
بس شدعوه مو كلا البلاوي من تحت روسنا @@ ..
و الحب يكون بالعقل و القلب ..
-
متابعين ، حافظك الله

عثماني يقول...

حيا الله اخيتي الراقصة على اوتار الغنج

معاج حق .. الرجل و المرأة طرفي الحب .. و النزاع ايضا

:)

شكرا جزيلا لمتابعتج لما كتبت

سعيد جدا لمرورج

حفظك الرحمن